ჰოლივუდელ მსახიობს, ქეით ჰადსონს მამა პატიებას სთხოვს. ცნობილმა მუსიკოსმა, ბილ ჰადსონმა, რომელმაც ქეითი და მისი ძმა ბავშვობაში მიატოვა, მემუარების წიგნი გამოსცა, სადაც ჩადენილ საქციელს ნანობს.

ქეით ჰადსონისა და მისი ძმის, ოლივერ ჰადსონის ცხოვრებაში ბილი აღარასოდეს გამოჩენილა. ბავშვების აღზრდაში მის მეუღლეს, ჰოლივუდის ვარსკვლავს, გოლდი ჰოუნს მეორე მეუღლე, კურტ რასელი დაეხმარა. ჰოუნი ყოველთვის აღნიშნავდა, რომ ქეითისა და მისი ძმისთვის ჭეშმარიტი მამა სწორედ რასელი იყო.

ამჯერად ბილ ჰადსონი მემუარების წიგნში "2 ვერსია: წარმატებისა და ოჯახის გვერდითი მხარეები" შვილებს პატიებას სთხოვს და საზოგადოების წინაშე გატეხილი სახელის აღდგენასაც ცდილობს. მუსიკოსს, როგორც უპასუხისმგებლო ქმარს და უვარგის მამას, გოლდი ჰოუნმა და ქეით ჰადსონმა თავიანთ ინტერვიუებში საგრძნობლად შეულახეს იმიჯი.

"გოლდი თავად მიშლიდა შვილებთან კონტაქტს და ისინი ჩემს წინააღმდეგ განაწყო. მე კი შვილები ძალიან მიყვარს, ამიტომ მათ პატიებას ვთხოვ", - წერს ბილ ჰადსონი და წიგნის საშუალებით თავისი საქციელის ახსნას ცდილობს. მას იმედი აქვს, რომ წიგნი მოზრდილ შვილებთან "ჯანსაღი" ურთიერთობების ჩამოყალიბებაში დაეხმარება.

"შეგვიძლია ჯანსაღი და მოზრდილებისთვის შესაფერისი ურთიერთობა დავამყაროთ, სანამ ძალიან გვიან არ არის", - აცხადებს ჰადსონი.

მისი მემუარები ლოს-ანჟელესისა და ნიუ-იორკის წიგნის მაღაზიებში ნოემბრიდან გამოჩნდება.